Ако случајно во џебот ви се наоѓа кешарица во вид на 108 милиони евра, би можеле да се почестите со најскапата куќа на светот, која од завчера е на продажба. Луксузната вила, дворец, се наоѓа на 40 километри од центарот на Лондон, содржи пет базени и 22 спални соби, секоја со посебна бања, но и "Panic Room", или собата за бегање и криење во случај на непожелни гости. Куќата се вика "Updown Court", до сега за медиумите остана неистражена, а сопственикот, исто така е мистерија. На веб-страницата на куќата стои дека "ова е најважната приватна англиска резиденција, изградена уште во 19 век" (реновирана во 2000 година). Внатрешноста во себе крие и кино-сала, терен за сквош, тенис, кугларница со две патеки, подземна гаража за осум лимузини, а со комплетниот имот на продажба одат и двете гостински "куќички" со 8 спални соби. Коњската ергела, езерото со фонтана, платформата за слетување на хеликоптери и богатиот вински подрум, исто така влегуваат во цената, исто како и соседите: Војводата од Јорк, Елтон Џон и англиската кралица во блиската палата Виндзор!