| fio |
Независност до јаја - Извинете што не прашавме дали може да се браниме
Лидерите на владејачките СДСМ Бранко Црвенковски и на ДУИ Али Ахмети во придружба на најтесните партиски раководства, по акцијата на МВР и Армијата за разбивање на вооружените криминални банди во реонот на Брест во саботата, на барање на ДУИ, состанчеле до раните утрински часови. Била формирана работна група на ниво на највисоки партиски претставници, министри и заменици-министри за внатрешни работи и за одбрана, како и претставници на силите на Конкордија и на ОБСЕ. Консултациите се очекуваше да продолжат и вчера попладне.
Али Ахмети му бил лут на Бранко Црвенковски, зашто наспроти најавите за начинот за справување со криминалните банди кои дејствуваат на Скопска Црна Гора, сметал дека била преземена жестока акција спротивна на договореното и била употребена прекумерна сила, во која настрадало цивилно население, нивните куќи, училиштето и џамијата во Брест.
Затоа, работната група сега ќе ги испитува околностите под кои е изведена акцијата, дали полицијата претерала при употребата на сила и дали во акцијата имало загинати и ранети цивили.
МВР соопшти дека успешно била завршена полициската акција во соработка со Армијата за разбивање и уништување на криминална вооружена група во околината на селото Брест. Во акцијата, поради "одбивање да се предадат и поради употреба на оружје", биле убиени неколку припадници на групата, се наведува во соопштението.
Вицепремиерот Муса Џафери, вчера за ВЕСТ, изјави дека ДУИ на некој начин била изиграна од СДСМ, односно од безбедносните органи кои ја планирале акцијата за анулирање на криминалните банди кои дејствуваат во Скопско и Кумановско. "Не е целта само да се употреби сила. Ние сметавме на други методи, како што се договаравме. Нашите претставници во МВР и во Министерството за одбрана, замениците - министри Хазби Лика и Ризван Сулејмани воопшто не беа информирани дека ќе има акција, а не пак за жестока акција. МВР и Армијата се должни сега да објаснат што правеа во саботата во селото Брест", ни изјави вицепремиерот Џафери. На прашање дали ДУИ отстапува од борбата против криминалот и вооружените банди и дали ќе им застане на патот на полицијата и Армијата, Џафери рече дека тоа е определба на Владата, но дека во случајот во саботата "требаше да се употреби повеќе интелигенција, а помалку сила. Ние имаме одговорност пред жителите кои се најдоа во огнот", објаснува Џафери.
"ДУИ ќе ја напушти коалицијата со СДСМ и ќе излезе од Владата, ако се потврди дека има многу цивилни жртви во акцијата на полицијата и Армијата во селото Брест", изјави вчера за Макфакс анонимен висок претставник од ДУИ. Тој вели дека се уште нема точни информации, но ако цивилните жртви се во голем број, тогаш Али Ахмети ќе ја раскине коалицијата со Бранко Црвенковски.
Дневник
|