ДАЛИ СМЕ НА ДОБАР ПАТ СО РЕФОРМИТЕ ВО ПРАВОСУДСТВОТО?
Неопходни ли и се на Македонија реформи во судството или промените ги прави заради влез во Европа? Колку македонското судство ги исполнува стандардите и дали има отпор кај судиите за спроведување на реформите?
Судиите и професорите кои денеска дебатираа на тркалезната маса организирана од балканската истражувачка мрежа сметаат дека дури за неколку години реформите ќе се покажат како успешни. Велат дека судиите не се корумпирани, туку транспарентни. Сепак признаваат дека тешко ќе се отстрани политичкото влијание врз судската власт.
„Ние сите тука молчиме. Зборуваме за некоја си судска олигархија и политичко недоразбирање, а ја забораваме бизнис олигархијата која е најопасна и која има најголемо влијание“, рече Вели Ведат, претседател на Апелациониот суд.
Каков да биде мандатот на судиите, пробен или траен?Виктор Цветковски, државниот секретар во министерството за правда смета дека подобро ќе биде судиите да имаат пробен мандат, ако се покаже дека добро ја вршат нивната работа, тогаш заслужено нивниот мандат преминува во траен.
Судиите треба да бидат мнозинство во независното тело, рекоа учесниците на трибината.
„Ако луѓето решиле да те тргнат, со или без двотретинско мнозинство ќе најдат начин да те тргнат“, истакна Џемали Арифи, претседател на Основниот суд 1 – Скопје.
„Со оглед на измените или уставните амандмани кои што се предвидуваат, фактички го правиме изборот на судиите. Го правиме независно од собранието. Значи треба да ги бира независен орган, во кој најбројни ќе бидат судиите“, истакна Виктор Цветковски, државен секретар во Министерството за правда.
Учесниците се согласија дека Македонија е на добар пат, но мора да ги подoбри стандардите, ако сака успешни реформи.