| dejan |
Рудари-сдсмовци против рудари вмровци
ШТИП - Градоначалникот на Македонска Каменица, Перо Митревски, јавно се закани дека во мај, за кога се предвидува свечено да биде пуштен во работа рудникот "Саса", наместо славење, какво што му прилега на таков настан, во рударскиот град ќе имало големи безредија. Тој не ја исклучува ниту можноста од физички пресметки во кои ќе се судрат каменичани -вмровци против каменичани-сдсмовци.
"Рестартот на рудникот е чисто политички чин. Во таа операција се ангажирани 99,99 отсто членови на СДСМ. Бидејќи во општинава тие немаат 550 члена, огласи за прием на рудари пуштија и во соседните општини од каде што ќе регрутираат сдсмовски активисти. Јас сум градоначалник на сите жители на Каменица и избран сум да се борам за егзистенцијата на луѓето од нашата општина. Нема да дозволам партиската книшка на СДСМ да биде единствен услов за вработување во рудникот. Ако се продолжи со оваа практика на сдсмовските кадри во Каменица, тогаш во мај во Каменица може да се случат многу несакани работи", изјави за нашиот весник Митревски.
Ставот на луѓето кои како стручњаци се ангажирани да работата на рестартот на "Саса" во однос на ваквите изјави на градоначалникот е дека Митревски Ј прави голема штета на Каменица и на нејзините жители: "Двата досега објавени огласа за прием на рудари го распишаа руските стручњаци кои одамна се во "Саса". Во таа работа е постапено согласно со нашите закони. Инвеститорот не дошол тука за да фрла пари во бунар, односно да вработува партиски активисти. Напротив, уште во почетокот Русите ставија до знаење дека ќе направат избор на најдобрите, психофизички најподготвените кандидати. На оние што ќе се покажат како најквалификувани за работа во јама, во флотација и на сите стручни места. Наместо да се радува што рудникот конечно ќе проработи и ќе биде новата локомотива за економски развој на подрачјето, градоначалникот фрла политички бомби со кои сака да ја замагли новата надеж, која со доаѓањето на инвеститорот се роди над ова пасивно подрачје. Неговите неодмерени изјави не се во функција на општиот интерес за прогрес на овој крај", ни рекоа лица од "Саса", кои инсистираа на анонимност.
Рускиот инвеститор досега објави два огласа за прием на работници во "Саса". И двата одеа преку Бирото за вработување во Делчево. "Првиот оглас го објавивме на 1февруари годинава. Рудникот бараше 65 работници-ракувачи на јамска механизација. Покрај во Македонска Каменица и ви Делчево, огласот е објавен и во соседните општини Кочани и Виница. Се јавија 537 кандидати. Во него има два битни услова - кандидатот да не е постар од 40 години и да има најмалку две години работно искуство во струката. Сите кандидати што ги исполнуваат условите ќе бидат тестирани од 1 до 15 март. Вториот оглас е објавен пред осум дена. Со него "САСА МР" бара инженери и техничари за производството во јама. Огласот трае до 10 март, а изборот на кандидатите ќе се спроведе преку нивно анкетирање, тестирање и проверка на знаењата", вели Билјана Прачковска, директорка на Бирото за вработување.
Според правни експерти, инвеститорот, ако сакал, можел огласот да го даде преку дневниот печат и да бара стручњаци и рудари од територијата на цела држава. Но, тоа ќе ги зголеми трошоците на работа, бидејќи на рударите од другите места мора да им се обезбеди секојдневен превоз. Тоа што на огласот можат да се јават и жители на соседни општини не е нова работа за рудникот, бидејќи и досега практиката била таква, а автобусите на "Саса" во времето кога рудникот работеше со полн капацитет редовно носеа рудари од Кочани, Виница, Делчево и од други места. Таа состојба траела со децении, а на ист начин и пробиштипскиот рудник "Злетово" се обезбедувал со квалитетни работници.
Sekogas nie Makedonci ke najdeme nacin za da se podelime. |