| Makedon |
Немало надворешни ниту внатрешни повреди и крвавења, а особено не на виталните органи, запишал докторот Јордан Никодиновски по обдукцијата на телото на првиот министер за внатрешни работи и негов личен пријател Јордан Мијалков, кој на 19 декември 1991 година, под, според многумина, нејасни околности почина по сообраќајната несреќа на патот Скопје-Белград. Доктор Никодиновски, кој веќе пет години е починат, тоа го запишал во својот тефтер, кого неговата сопруга Благородна Никодиновска, поттикната од контроверзните тврдења за случајот, вчера го донесе во Редакцијата на „Време“.
Од содржината на она што ни го презентира Никодиновска се гледа дека нејзиниот сопруг имал големи резерви кон официјалната верзија за случајот и дека „претполагал“ оти станувало збор за „елегантна форма за извршување на смртна пресуда“, исто како и внукот на Мијалков и лидер на ВМРО-ДПМНЕ Никола Груевски, кој пред извесно време ја отвори темата.
Докторот Никодиновски, според присетувањето на неговата сопруга, бил многу близок со Мијалков уште од раните 50-ти години и за него имал многу високо мислење. Кога во почетокот на декември 1991 година, Мијалков бил однесен во болница поради крвавење на чирот, Никодиновски речиси секојдневно го посетувал. По последното видување на 17 декември, еден ден пред Мијалков, на сопствена одговорност, да ја напушти болницата, Никодиновски запишал: „Мијалков ми кажа, докторе Орде, јас утре ќе ја напуштам болницата.“ Го убедував да остане бидејќи му е потребен лекарски надзор, а тој ми рече дека кај него дента бил советникот на Глигоров, штипјанецот Љуботенски, и дека го убедувал да поднесе оставка под изговор - болест. Љуботенски му кажал и дека во спротивно, елегантно ќе бил отстранет од функцијата. Поради тоа, морам да одам во Владата и да видам што се случува и зашто мораат да ме сменат, кажа Мијалков. Тоа ни беше последното видување“.
Никодиновски, два дена по последното видување, некаде околу 23 часот, го видел безживотното тело на Мијалков, на обдукциската маса во Институтот за судска медицина. По извесно време, Никодиновски запишал: „Сообраќајката, претполагам, беше режирана, измислена, современа, елегантна форма за извршување на смртната пресуда, посакувана во Собранието и во Владата, со што сакаше да се одложи осамостојувањето на Македонија, да се смират или потиснат национал-патриотските кадри и да засилат реформските сили што не беа убедени дека Македонија може да биде самостојна“. |