Премиерот Владо Бучковски, по повод муслиманскиот верски празник Курбан-бајрам, вчера организираше вечера за својот владин кабинет во владиниот ресторан.
За главен организатор што требало да го подготви менито за курбан вечерата, Бучковски го задолжил министерот за образование Азиз Положани, како најстар министер од ДУИ. За министрите било приготвено јадење што традиционално се служи за Курбан-бајрам.
Министрите од ДУИ рекле дека ќе честат баклава, но Бучковски им рекол дека нема да поминат со малку туку ќе мораат да дадат и вечера.
На вечерата се служеле чорба, јанија, ориз, пилешко месо и на крај дошле задолжителните баклави.
Со вакви седенки Владата ја продолжува традицијата што ја започна на 6 јануари годинава, кога во владиниот ресторан се служел бадников ручек. Тогаш за менито се грижел лично премиерот. Се служеле посна сарма, гравче и макало, а министрите кршеле три погачи. Во една од нив била скриена паричката. За Бадник паричката ја нашла вицепремиерката Радмила Шеќеринска.