Синдикатите на ЈП "Македонски железници" денеска ја продолжуваат целосната блокада на железничкиот сообраќај што ја почнаа вчера во 15 часот.
Ваквата одлука следува по преговорите со директорот на претпријатието и заменик-министерот за транспорт и врски на кои не е постигнат договор за барањата на синдикатите.
Управниот одбор на МЖ вчера донесе одлука за почнување на постапката на поединечното вреднување на вработените во претпријатието, според критериумите од член 227-а и 227-б од колективниот договор, како почеток на реализацијата на Програмата за намалување на бројот и структурата на вработените на кои ќе им престане работниот однос поради економски, технолошки, структурални и други причини.
Управниот одбор, исто така, одлучил да им предложи на синдикатите во Македонските железници, на вработените кои ќе бидат прогласени за технолошки вишок да им се доделат дополнителни четири отпремнини, за кои средствата би се обезбедиле со солидарно издвојување од платите или коефициентот на квалитетот во работењето од сите вработени во Македонските железници, како и од месечните надоместоци на членовите на Управниот одбор и Надзорниот одбор на ЈП "Македонски железници", во тек на неколку месеци.
Превземено од МИА